الرئيسية منوعات محمد عبدالماجد: فريق العلمة من ضعفوا ..الأقوان الجابوها فيه عندو فيها نص

محمد عبدالماجد: فريق العلمة من ضعفوا ..الأقوان الجابوها فيه عندو فيها نص

6 ثواني قراءة
التعليقات على محمد عبدالماجد: فريق العلمة من ضعفوا ..الأقوان الجابوها فيه عندو فيها نص مغلقة
0
0




جماعتكم وصلوا لي قناعة أن المجموعات دي ما عندهم فيها غير (التمريرات)

فريق العلمة من ضعفوا ..الأقوان الجابوها فيه عندو فيها نص

الزول البيجي لابس ليه جينز ومبرم شعرو ويطلع في المسرح وينزل من غير ما يقول أي حاجة دا منو؟

الدكتور من تلقوه بعاين فوق (النضارة) أعرفوه طوالي بعاين في رسوم الكشف

· واحد عمرو (93) سنة …ما بشوف…النوع البقول ليك واللـه الحياة زمان كانت حلوة وكانت جميلة – وهو قاعد بتابع في مسلسل (هيفاء وهبي).

· يضرب ليك في الجلي وكريم كراميل ويقول ليك الحياة زمان كان فيها (طعم).

· يشغل ليك المكيّف ويتكلم ليك عن (العصر الذهبي).

· الزول أبو (93) سنة دا تعب شديد … ودوه المستشفى.

· الدكتور قعد يدخل ويطلع.

· ويصلح في (النضارة)…أنا ما عارف (النضارة) دي عاوز يقنع بيها منو؟.

· الدكتور من تلقوه بعاين فوق (النضارة) أعرفوه طوالي بعاين في رسوم الكشف.

· آخر حاجة الدكتور بعد حركاتو دي قال ليه يا حاج أنا ح أشيل ليك (اللوز).

· عمكم قال للدكتور يا دكتور (اللوز) دي أنا تاني ما بحتاج ليها.

· الواحد برضو بعاين لي مستقبلو.

· والزمن ما معروف.

· والزول بدون (لوز) ما بعرف يتصرف.

· الدكتور قال ليه تحتاج ليها في شنو؟ وأنت عمرك (93) سنة…أنت مع (اللوز) مفروض نشيل ليك (لسانك) الطويل دا.

· عمك قال ليه : لا بس يا دكتور موضوع (اللوز) دا ما بأثر في السواقة..عندنا أخونا الكبير شالوا ليه (لوز) ناس حركة المرور سحبوا منو (الرخصة) قالوا ليه عاوز تسوق كيف بدون (لوز)؟.

· الدكتور قال ليه أنت أخوك الكبير لي هسع عايش.

· يا زول (اللوز) دي ما عندها أي علاقة بالسواقة ..إلّا يكونوا ناس الحركة ديل دخلوها براهم ..لكن (طبياً) ما في علاقة بين سواقة العربية واللوز.

· لكن يا دكتور المرة الفاتت مشيت أجدد الرخصة ..قالوا لي لوزك قاعدة؟.

· طيب يا دكتور ..الشيء دا ما بتأثر في (الرقم الوطني).

· الدكتور قال ليه يا زول علاقة اللوز بالرقم الوطني شنو؟.

· عمك قال ليه ..عندنا أبونا شال اللوز ..رفضوا يطلعوا ليه (رقم وطني) – قالوا ليه رقم وطني بدون (لوز) تعمل بيه شنو؟.

· الدكتور قال ليه أنت أبوك عايش؟.

· شوف يا حاج (اللوز) دي لا عندها علاقة بالرقم الوطني ولا بي جواز السفر ولا بي اللجنة الشعبية ذاتها.

· عمك وقت قالوا ليه كدا ..قال للدكتور خلاص شيلها – اللـه يعوضنا إن شاء اللـه فيها.

· زمان الحفلات كانت بالمكرفونات.

· حكاية الساوند ومهندس الصوت وفني الإضاءة دي حاجات ظهرت قريب.

· ظهرت حديثاً.

· والزول البجي لابس ليه جينز ومبرم شعرو ويطلع في المسرح وينزل من غير ما يقول أي حاجة.

· الحاجات دي جاءت هسع في الزمن دا.

· زمان كانت (مكرفونات) ساكت.

· مكرفونات (سليقة).

· والمكرفونات ذاتها كانت (مطفقة) وحالتها بي البلاء.

· الحفلات زمان كان عندها (طعم) وقت كانت بي (المكرفونات) – الصوت يطلع ليك من (المكرفون) مسخن ..زي الطالع ليه من فرن.

· عشان كدا فنان صوتو نص – نص ..ما بثبت ليه في حفلة..وما بقبلوه.

· صوتك فيه حاجة …المكرفون بطلعو ليك زي صينية البطاطس المحروقة.

· بي مناسبة صينية البطاطس (الحرقتها ليكم دي)..في فيلم (أبوعلي) لكريم عبد العزيز ومنى زكي كان (طلعت زكريا) في بداية الفيلم عامل فيها (مدرب).

· كان عامل فيها محسن سيد.

· لملم شفع الحلة ..وقعد يدرب ليك فيهم.

· طلعت زكريا كان بيشرك اللاعب في المباراة حسب (الوجبة) التى يحضرها له.

· يعني تجيب ليه (كوفتة) تلعب صانع العاب.

· شية جمر تلعب (مهاجم).

· سلطة أسود (مدافع).

· بامية مفروكة طرف شمال.

· قرع طرف يمين.

· عدس (حارس مرمى).

· في الفيلم كان في واحد من الشفع جاب لي طلعت زكريا (بصرة) ودي حاجة عندنا زي (السخينة)..طلعت زكريا حلف للولد وقال ليه واللـه أنا طول ما مدير فني للفريق دا أنت ما ح تغادر (الدكة).

· ما ح تغادر (الكنبة).

· طول عمرك ما ح تلعب.

· ودي حاجة ما تطلعني من زمن المكرفونات.

· صوتك تمام ..المكرفون بطلعو ليك يلمع.

· الصوت الجميل بخلي ليك الناس كلها في الدارة.

· والمكرفون كان صوتو بصل لغاية الحلة التانية.

· الحفلة تكون بالشرق ..تلقى الناس في غرب النيل قاعدين يرقصو.

· أصوات قوية …والمكرفون ما قاعد يقصر مع الأصوات الجميلة.

· في خضم هذه الأشياء ..في (شفوت) بكونوا براقبوا في الموقف.

· أول حاجة بكوّنوا ليهم (لجنة) سرية – مهمتها تعرف الحفلة بي منو؟.

· زمان فنان الحفلة ما كان بيعلنو عنه ..لغاية ما الفاصل الأول ينتهي أنت ما بتكون عارف الفنان دا منو؟.

· الناس كانت تموت وتعرف الحفلة بي منو؟.

· الشباب زمان وقت يعرفوا ليك فنان الحفلة …بكونوا لجنة تانية تراقب الموقف الداخلي.

· مهمة هذه اللجنة يشوفوا (المكرفونات) ركبوها ولّا لسع؟.

· أول ما يركبوا (المكرفونات) الجماعة يظهروا ليك.

· قبل ما يركبوا (المكرفونات) قرد ما بتلقاهو في المناسبة.

· ناس المريخ ديل هسع نحن في العصر الحالي دا عاوزين يرجعونا لي زمن (المكرفونات).

· عاوزين يرجعونا للعصر الحجري.

· جماعتكم ركبوا ليهم (مكرفونات) ودوروا ليك في (التمريرات).

· مرة يقولوا ليك 35 تمريرة.

· ومرة يقولوا ليك 70 تمريرة.

· ومرة يقولوا ليك 85 تمريرة.

· ومرة يقولوا ليك 88 تمريرة.

· كل يوم بزيدوا فيها.

· الليلة بكونوا وصلوها (100) تمريرة.

· عليكم اللـه شفتوا الناس الفاضيين ديل.

· قعدوا يحسبوا في (التمريرات).

· دا شغل بتاع إفلاس.

· التاجر من يفلس بقعد يحسب في (التمريرات).

· جماعتكم وصلوا لي قناعة أن المجموعات دي ما عندهم فيها غير (التمريرات).

· عشان كدا مسكوا فيها قوي.

· يا ها المحرية فيكم.

· لقيتوا لي الفريق (الدرجة تانية) دا وصدقتوا.

· انتظروا الراجيكم.

· المريخاب عرفوا ليك الموضوع ما ح يمشي لي قدام – قالوا أحسن نقوم نكبر كومنا من بدري.

· تاني زي دا ما بنلقاه.

· لقوا ليهم (فريق درجة تانية)…نحن في (الدورة المدرسية) ما بنقبل بيهو..انتصروا عليه 2 / صفر.

· قون جابو المريخ – وقون جابوا براهم.

· فريق (العلمة) دا ..النوع البيشتغل بالنص نص.

· زي الزول البقول ليك أنا بطلع ليك الموضوع – لكن بالنص.

· أو لقيت ليك البيت …لكن الفائدة البتطلع بي النص نص.

· ويقعدوا يحسبوا ليك في (العيدان).

· العلمة دا …حتى الأهداف التى سجلت في مرماه عنده فيها نص.

· لاقاكم (حمام) بالشكل دا.

· شابكننا بكري المدينة جاب قونين – بكري المدينة جاب قونين ..والقون الأول طلع جابو المدافع.

· الحكم قال كدا – بس عشان تعرفوا (كضبكم).

· بتشقلب ساكت يا بكري المدينة.

· مستواك انتهى ..القون بقى يجيبو زول تاني …تقوم أنت البتشقلب.

· رايحة ليك (شقلبة).

· على العموم دا آخر (حمام) تشقلب قدامو.

· شقلباتك انتهت لغاية هنا.

· حليل (هوبة) مهند الطاهر.

· ……….

هوامش

· الإعداد لفريق سموحة ..يجب أن يكون في المقام الأول إعداد (جماهيري).

· المباراة لا حقت بشه.

· ولا حقت جوليام.

· ولا حقت مكسيم.

· ولا حقت كاريكا.

· المباراة حقت (جماهير) الهلال.

· عاوزين جماهير الهلال تعود لإبداعاتها ونشوفها تاني في المدرجات تعمل البدع.

· روابط الهلال وجماهيره ..مباراة سموحة مباراتهم في المقام الأول.

· لذلك يجب أن يكون الاستعداد لهذه المباراة استعداد جماهيري.

· مباراة سموحة إن شاء اللـه تكون مباراة الصدارة.

· ونحن لو مسكنا تاني ما بنفك.

· مباراة الأمل أيضاً يجب أن يكون التركيز فيها عالياً.

· نيلسون إذا دخل فورمة المباريات سوف يكون أخطر لاعب في البطولة كلها.

· الهلال يحتاج إلى (قوة) نيلسون على وجه خاص في المرحلة المقبلة.

· ابتعاد نيلسون في الفترة الماضية كان خسارة للهلال.

· الكاردينال مطلوب منه أن يكون قريباً من اللاعبين.

· المرحلة القادمة مرحلة (حصاد).

· الأفريقية.

· الممتاز.

· كأس السودان.

· الهلال عنده أكثر من تشكيلة ..وفيه مجموعة من المواهب والعناصر المتعددة ..لذلك هو الأقدر على حسم جميع البطولات التى يشارك فيها.

· مباراة سموحة يوم 12 يوليو سوف تكون سهرة رياضية رائعة.

· المباراة سوف تكون قبل العيد يوم 25 رمضان.

· يعني أحلى عيدية إن شاء اللـه سوف يقدمها اللـه.

· ناس (سموحة) وقعوا وما سموا.

· ناس سموحة تعبوا معانا.

· نحن لا بنعرف سموحة ولا بنعرف كاني.

· نحن الأهلي المصري بتعب معانا ..كمان تجيبوا لينا سموحة.

· الزمالك السنة الماضية انضرب زي الما حصل حاجة.

· كمان جايبين لينا سموحة.

· ابقوا مارقين من هسع على سموحة.

· بي طريقتكم يا ناس سموحة جيتوا لينا في ظروف صعبة.

· ظروف نحن بنضرب فيها من طرف.

· وخلوا بالكم من (الأمل).

· …………

· عاجل : علاء الدين يوسف تونس قال (برجم)…الجزائر أخد ليها (كرت أصفر)…يعني سفرة بعتذر عنها بـ (كرت الحمى الصفراء) وسفرة بعتذر عنها بـ (الكرت الأصفر).







علق بواسطة فيسبوك

تعليقات

التعليقات مغلقة

إقرأ أيضاً

نظامي يبتز أسرة سودانية رفضت تزويجه ابنتها ..ويهددهم بشيخ تشادي و نشر صورها في الأنترنت

شرعت محكمة بحري وسط في محاكمة نظامي متهم بابتزاز أسرة بصورة فوتوغرافية التقطها مع ابنتهم ا…